福州野価後生囝乞時行其影片配音，譬如講《機器貓》《搞笑漫畫日和》，去宣傳福州話。伊各儂配音其時候，都將趁字幕去看有仂囝講書語其臺詞換成口語。我以爲嚽伓著勢是因爲今旦講福州話其變少去了（寫遘這所我下意識想寫「式微」），但是仈曾看福州話基督教《聖經》裏勢，也這樣款翻譯，譬如講「無始無終」寫成「無起頭無煞尾」，見覺野奇怪。佪我準哩，古代福州話就儥正規，故此這樣款翻譯，福州儂會聽會意。正聽了蜀隻廣東其配音組乞蜀隻日本動畫其預告片配音，裏勢有蜀句「被判死刑」，嚽是比喻，就是講這隻儂會死。我想廣東配音肯定會講「死刑」這兩芘字，但是伊各儂也講會死，避去「死刑」者書面辭。廣東話有夠正規了，結果故總款翻譯？雖然着香港書面使官話白話文，但是也是使廣東話講，廣東話講書語，許塊儂應該當會聽，留下「死刑」這芘詞，伓損失蜀隻文藝作品「修辭」其信息，理固宜然。但是伊各儂講了會死。噯，這翻譯其道理故盡深，我故着好好探究。

知乎懸頂有蜀隻號𡅏東南西北其儂，使漢語拼音寫文章，伓寫漢字，讓大家審視口語共書語其關係。趁嘻時候，我就反思寫福州話其時候加教會羅馬字版本其必要性。但是介蔣講，我落筆故是愛寫書語，其一我兩個聲——嚽也無辦法，其一伓寫書語我也儥爽快。